Siglir tar il cuntegn

Archivar recumonda Malauras e bovas en il Grischun

L'onn 1987 è stà in onn da malauras cun grondas inundaziuns en pliras parts dal chantun Grischun. Il 2002 aveva ina bova dividì il vitg da Schlans. Il 2005 era la vischnanca da Susch stada sut aua.

bova material
Legenda: Il Grischun è adina puspè pertutgà da bovas Material che vegn giu da la Val Parghera sur Domat Keystone

Il Grischun sco chantun muntagnard è adina puspè pertutgà da bovas. Mez mars da quest onn è vegnì giu ina gronda bova sur Sedrun. La bova da la Val Strem ha purtà 200’000 meters cubic crappa e grippa a val (link). Gia dapi onns vegn giu da la Val Parghera a Domat rauba da plattamorta che periclitescha la via chantunala, ils binaris da la Viafier Retica ed ils vials da l’autostrada A13 (link).

En las annalas pervia da grondas malauras e bovas en il Grischun van ils onns 1987, 2002 e 2005.

Il 1987 èran grondas parts dal Grischun stadas pertutgadas d’inundaziuns. Il 2002 èn duas vischnancas stadas en il focus: la vischnanca da Schlans ch’è vegnida dividida en duas parts entras ina bova e la gronda massa da glera ch’è vegnida a val al ur da la vischnanca da Rueun. Il 2005 avevan fermas malauras destruì pliras parts da la vischnanca da Susch. La Televisiun Rumantscha aveva rapportà da las inundaziuns:

L’onn 1987 avevi dà suenter malauras grondas bovas ed inundaziuns en l'Engiadina, en il Puschlav ed en la Cadi sissum la Surselva. Damain pertutgà era stà il Grischun Central. Il Radio Rumantsch aveva rapportà direct dals plazzals cun gronds donns nua ch’era persunas avevan pers la vita.

10 onns suenter las catastrofas natiralas era vegnì reprendì il tema en ils lieus pertutgads. Co era la situaziun sa midada en ils lieus da catastrofa. Aveva la bova dal 2002 da Schlans betg mo dividì il vitg, mabain era la populaziun en duas parts?