Siglir tar il cuntegn
cuntegn

Archivar recumonda La Pro Surselva – l'uniun per la collavuraziun regiunala

La Pro Surselva è stada ina da las emprimas organisaziuns regiunalas dal Grischun. Quellas èn vegnidas fundadas ils onns 60 e 70 en connex cun il «nov concept per promover las cuntradas muntagnardas». Quel pretendeva tranter auter che las vischnancas furmian regiuns per pudair surviver.

Grafica Pro Surselva.
Legenda: Mo ensemen pon las vischnancas avair success. RTR

Promover ils interess economics, culturals e socials en Surselva e chattar meds e mesiras per impedir l'emigraziun dals vitgs. Quai è stà l'intent da fundar ils 15 d'avust 1967 la Pro Surselva.

Legenda: Guardar il video Purtret da la Pro Surselva. Durada 21:58 minutas.
Or da L'archivar recumonda dals 14.09.1975.

Blera lavur

Ina da las emprimas lavurs da l'uniun è stada da sviluppar la planisaziun regiunala sco basa per meglierar las relaziuns da viver en Surselva e per collavurar tranter vischins e vischnancas. Plinavant da proteger las cuntradas e bellezas natiralas.

Pliras gruppas da lavur da la Pro Surselva èn sa fatschentadas tranter auter cun dumondas

  • da la scolaziun e furmaziun,
  • dals uraris da viafier ed auto da posta
  • da la tgira da vegls ed uffants pitschens.

Igl ha dà retschertgas, questiunaris, rapports e bainspert era resultats. Sco quai ch'il Radio Rumantsch ha rapportà il 1972 hai era dà bainbaud resultats – tranter auter la scola da musica u la meglieraziun da l'urari da la viafier.


Ina regiun cuntanscha bler sch'ella è unida e mintgin sa gida!
Autur: Leo CondrauPresident cumissiun colliaziuns da viafier ed auto da posta

Gia 2 onns avant ha il Radio Rumantsch emess ina discussiun directamain da la HIGA. En quella han represchentants da la Pro Engiadina Bassa e da la Pro Surses en fundaziun prendì sut la marella la Pro Surselva e sias finamiras.


La Pro Surselva ed il rument

Ina gronda incarica da la Pro Surselva è stada la dismessa dal rument. Tschertgar e chattar ina deponia da rument centrala è stà be ina sfida. Suenter avair chattà quai plaz a Plaun Grond a Rueun hai gì num chattar lieus per ils rustgs che na pudevan pli metter lur ova en quai lieu. Plinavant da liberar Rueun dals tuffiens da la deponia.