Siglir tar il cuntegn

Header

Navigaziun

cuntegn

L'archivar recumonda La buccaria - amada e odiada

Datti anc la buccaria? Gea e na. Bler dependa sche la cuntrada è anc favuraivla a ses svilup sco larva sut terra e sche mesiras da cumbatter ella èn pridas. En principi, en in ciclus da trais onns per regiun, pon ins quintar cun l’appariziun da quai animalet magliadrun sin nossas plantas.

Buccaria sa nutrind da feglia da plontas
Legenda: Buccaria sa nutrind da feglia da plontas rtr

„Es gibt keine Maikäfer mehr…“ quai chantava Reinhard Mey 1973 cun lev malputgà. Sco per blers uffants da sia generaziun era rimnar e schizunt barattar buccarias sia passiun. Er devi in temp la chaschun per ils giuvens da far in pau raps cura che la vischnanca pajava anc per liter (!) las buccarias rimnadas.

Plaschair per ils ins, mulesta e donns per auters. Las buccarias na maglia betg mo la feglia da certas plontas, na ils coss han gia durant 2 onns maglià sut terra era las ragischs da l’erva, en spezial dals prads maghers.

Il cumbat cun tissi ina giada, plitost meds biologics ozendi e la transfurmaziun dad ambient e cuntrada pon effectivamain laschar dubitar tschertins sch'i dat insumma anc buccarias.

Mo na, las buccarias n’èn betg svanidas dal tuttafatg. Era quellas che n'èn betg ord tschigulatta. Ellas ans restan anc sco segn che... la primavaira è finalmain qua!

Senza donns, per voss spir interess e plaschair laschain crablar noss bau da matg ord las profunditads da l’archiv RTR. I dat insatge per guardar, per tadlar, per emprender ad enconuscher u simplamain s’allegrar – per gronds e pitschens.