Il Grischun - tunnels e festas d'inauguraziun

Quests dis è il tunnel dal Gottard vegnì inaugurà cun pump e massa prominenza – il Grischun n’ha betg giugà ina gronda rolla en quell’inscenaziun. Quai malgrà ch’el ha atgnamain anc in pau experientscha dad inaugurar e festivar averturas da tunnels, sco quai ch’in sguard en l’archiv mussa.

Il tunnel dal San Bernardino

In dals impurtants tunnels grischuns per la colliaziun dal nord al sid è il tunnel dal San Bernardino. L‘inauguraziun da quel ils 1 da december 1967 ha intimà il Radio Rumantsch ad ina emissiun speziala.

Laschar ir video «12-11-1967 - via libra tras il San Bernardino»

12-11-1967 - via libra tras il San Bernardino

18 min, L'archivar recumonda dals 3.6.2016

Per il balcun tort è l’avertura stada il mument per preschentar la muntada dal pass dal San Bernardino e la construcziun dal tunnel.

Il tunnel da viafier tras il Vereina

Ils 19-11-1999 è il tunnel da viafier tras il Vereina vegnì inaugurà. La Televisiun Rumantscha n`è betg mo stada a la festa d’inauguraziun – ella ha era rapportà dals dis avant l’avertura cun exercizis da catastrofas e cun dis dal tunnel avert.

Il tunnel Crapteig

Laschar ir video «Preschentaziun dal tunnel Crapteig»

Preschentaziun dal tunnel Crapteig

2:06 min, dals 3.6.2016

Il tunnel Crapteig è vegnì inaugurà il 1996. Uschia è l’ultim tschancun da la A13 stà a fin – era qua ha la populaziun pudì contemplar quell’ovra, avant ch’ils autos èn charrads atras.

Ils tunnels da sviament da Trin e Flem

La Surselva ha survegnì dus impurtants tunnels en il decurs da gnanc 20 onns. Ils 4 da november 1994 è il tunnel da Trin vegnì avert. In tunnel ch’ha distgargià fitg Trin dal traffic sin via. Lura hai dà dals 26 fin ils 28 d’october 2007 festa a Flem – quels dis è il tunnel da sviament vegnì surdà al traffic ch’ha betg pli da circular tras il vitg da Flem.

Natiralmain hai anc blers tunnels da via e viafier en il Grischun - dentant n'èn betg tut las festas d'inauguraziun documentadas en ils archivs dad RTR.