Siglir tar il cuntegn
Inhalt

Archivar recumonda Il bulieu - La planta che leventa emoziuns

Il bulieu fa plaschair al rimnabulieus che giauda dad ir a tschertgar els e forsa era mangiar. Era il chatschader po avair gugent il bulieu, main dentant ils rimnabulieus che zappignan per il guaud enturn e spaventan la selvaschina. E tema fa il bulieu sch’el attatgà monuments ubain autras plantas.

La vita misteriusa dals bulieus

Il bulieu è ina planta cun funcziuns impurtantas en la natira. En il Radioscola dal 1985 han ils redacturs dà ina survista generala dal bulieu. Cun exempels ed exercizis decleran els la vita misteriusa dal bulieu. D'ina planta che viva en il zuppà, en stgira retratgadad e umiditad e che na fa betg mo plaschairs. En la broschura accumpagnanta èn ils exercizis.

Il bulieu destruider

En il Radioscola vegn discutà dal bulieu che po far donn. Da quels exempels èsi era da chattar en l’archiv dad RTR. Uschia ha la televisiun Rumantscha per exempel rapportà dal bulieu ch’ha attatgà il palantschieu sura da la baselgia Sontg Martin a Ziràn e documentà las lavurs da sanaziun. Plinavant ha il TSG mussà il bulieu ch’hà infestà l’orgla da la baselgia claustrala a Mustér ni il bindel cotschen ch’ha fatg fastidis al tieu en la Tumleastga.

La fascinaziun bulieu

Bleras e blers van per bulieus, enconuschan differentas sorts e giaudan lura els en spaisas gustusas. Il 2009 è l’emissiun da Camifo dal Radio Rumantsch sa fatschentada da rudien dal hobi «bulieu». La redactura ha accumpagnà ina rimnabulieus e tractà differents aspects davent dad ir a tschertgar els fin al cuschinar.

Il bulieu e las emoziuns

Ils rimnabulieus ed ils chatschaders n’èn betg ils megliers amis. Persuenter duess il chantun e la polizia atgnamain d’avair gugent ils rimnabulieus – surtut quels che n’enconuschan ni respectan betg las reglas e van per bulieus da temps scumandads ubain prendan memia bler. Quels portan adina puspè daners en la cassa chantunala sco quai ch’il TSG ha rapportà da differenzas razzias sin via.