Siglir tar il cuntegn
cuntegn

Archivar recumonda Co ha la selvaschina survivì l'enviern?

Quai è ina dumonda che sa tschenta mintga primavaira. Il pli tard sch'ins va a spass tras il guaud e chatta qua e là cadavers da tschiervs ubain chavriels. Il medem mument vegn lura era la dumonda, co pudess ins evitar talas unfrendas. In tema che ha era fatschentà adina puspè RTR.

Sustegn dal chantun per pavlar la selvaschina

Envierns cun blera naiv chaschunan savens bleras sperditas da selvaschina. L’enviern 1969/70 èn per exempel var 2’000 animals selvadis crappads. Per evitar che tanta selvaschina crappa pervia da las navadas propaghescha l’inspectur da chatscha dal Grischun Peider Ratti tranter auter da pavlar la selvaschina. En ina contribuziun dal balcun tort dals 14 da matg 1972 declera Ratti ch’i dettia cun la nova lescha da chatscha ina taxa per metter a disposiziun ils meds necessaris per pudair pavlar la selvaschina.

Legenda: Guardar il video Pavlar la selvaschina per evitar grondas sperditas durant envierns crivs. Durada 06:29 minutas.
Or da L'archivar recumonda dals 14.05.1972.

Novs concepts per la tgira da la selvaschina

L'enviern 1994/95 è stà in enviern plitost miaivel per la selvaschina. Tuttina constatescha l’inspectur da chatscha dal Grischun Peider Ratti en la Svizra Rumantscha – Cuntrasts dals 07 da matg 1995: “Cun l’entschatta da la primavaira sa dasda nova vita – la selvaschina ha basegns da nutriment, las vatgas-tschierv e las chauras-chavriel portan ora lur pitschens, ils tschiervs han si lur cornas, ma la natira dat betg erva, pir davent dal matg/zercladur èsi uschè lunsch. Igl è in grond basegn d’energia e la natira dat pauc energia”. Novs concepts da la tgira dals animals duain meglierar la situaziun.

Legenda: Guardar il video Co ha la selvaschina surmuntà l'enviern?. Durada 03:46 minutas.
Or da L'archivar recumonda dals 07.05.1995.

La dumbraziun da la primavaira

Co è la situaziun da la selvaschina suenter in enviern criv? Resposta a quella dumonda dat tranter auter la dumbraziun da la selvaschina. Il matg 2001 ha il Telesguard accumpagnà il guardia-selvaschina e ses gidanters durant ina notg da dumbraziun. In inscunter cun chavriels, tschiervs, vulps e lieurs.

Legenda: Guardar il video La dumbraziun da la selvaschina la primavaira. Durada 02:58 minutas.
Or da L'archivar recumonda dals 21.05.2001.

Ils capricorns da Puntraschigna

Mintga primavaira vegnan ils capricorns en la vischinanza da Puntraschigna. Els giaudan l’erva fina e van fin en il santeri per siglir per ils mirs enturn. (Telesguard 29-05-2008)

Legenda: Guardar il video Ils capricorns da Puntraschigna. Durada 00:52 minutas.
Or da L'archivar recumonda dals 29.05.2008.

La selvaschina e l'enviern

L’enviern criv selecziunescha la selvaschina – quai è stà uschia l’enviern 1969/70 ed era anc auters suenter. Fertant che l'uffizi da chatscha promoveva avant onns da pavlar la selvaschina è quai sa midà en il decurs dals onns. Oz è pavlar la selvaschina scumandà - en situaziuns extraordinarias decida il departament cumpetent mesiras d'urgenza.