Siglir tar il cuntegn

Header

cuntegn

Ski nordic Falun 2015 «God morgon» Falun

Èn ils Svizzers èn furma? Astgan ins spetgar medaglias svizras ni rumantschas? Tgi èn ils favurits? Quellas dumondas vegnan respundidas cun las davosas infurmaziuns avant las cursas.

Il campiunadi mundial da ski nordic a Falun è era il campiunadi dals Rumantschs. 5 passlungists rumantschs èn a la partenza. Sper la gronda speranza svizra Dario Cologna era ses frar Gianluca, Curdin Perl, Toni Livers e Jonas Baumann. Sche tut va bain datti per l’emprima giada en l’istorgia ina staffetta svizra cumplainamain rumantscha.

28.02.2015

La cursa da 30 kilometers classic al campiunadi mundial da ski nordic a Falun è la cursa roiala da las dunnas, il medem sco ils 50 kilometers tar ils umens. Sche la norvegiaisa Marit Björgen defenda ses titel daventa ella suletta campiunessa da record. Avant dus dis ha Björgen egalisà il record da 14 victorias da la russa Elena Välbe. Era duas svizras partan als 30 kilometers da Falun: la bernaisa Nathalie von Siebenthal e la grischuna Seraina Boner. Boner trenescha savens en Svezia e discurra era svedais. Per ella èsi perquai quasi ina cursa da chasa a Falun.

27.02.2015

A Falun è il Tudestg siglì duas giadas il pli lunsch ed ha gudagnà la concurrenza avant l'Austriac Gregor Schlierenzauer. Per la Germania è quai l'emprima medaglia d'aur en siglir singul dapi 14 onns. Meglier Svizzer è Gregor Deschwanden sin plazza 17. Simon Ammann è 23avel e Kilian Peier 30avel.

26.02.2015

La staffetta da passlung è en tiaras sco la Svezia e la Norvegia la luschezza d’ina entira naziun. Al campiunadi mundial da ski nordic a Falun èn oz e damaun las staffettas cun il grond cumbat Svezia cunter Norvegia. La Svizra parta mo damaun tar ils umens. Oz tar las dunnas è nagina staffetta svizra a la partenza. Malgrà che las curridras svizras han fatg furori stersas cun dus plazs en las top 10 da Nathalie von Siebenthal e Seraina Boner sur 10 kilometers stil liber. Tge manca che la Svizra n’è betg abla da trametter ina staffetta da dunnas a la partenza dal campiunadi mundial? Hippolyt Kempf, il schef passlung da Swiss-Ski ha dà la resposta al Radio Rumantsch.

25.02.2015

Cun in pitschen retard entschaiva oz il campiunadi mundial da ski nordic a Falun era per Toni Livers. Il currider da Trun è stà malsauns curt avant il campiunadi ed ha desistì dal skiatlon . Uschia ha Toni Livers gì pli ditg peda da sa preparar sin sia disciplina da parada, ils 15 kilometers en stil liber. En questa disciplina sa senta el bain ed ha eracuntanschì ses megliers resultats. La cursa cumenza oz a las 13.30.

24.02.2015

En la cursa sur 10 kilometers en il stil classic, vegnan segiramain las Norvegiaisas a cumbatter per las medaglias, las Svizras dentant plitost betg. Sche gie che Seraina Boner e Nathalie von Siebenthal èn en buna furma, vegn i strusch a tanscher per ils plazs davanttiers. La Grischuna Seraina Boner na vul betg sa metter sut squitsch. Ella n’ha betg ina finamira concreta e veglia era giudair la grondiusa atmosfera a Falun. La cursa cumenza a las 13:30.

23.02.2015

Triumfs e tragedias, tops e flops, surpraisas e trumpadas. Quai fa part d’in campiunadi mundial. Tut quai hai era dà en l’emprima part dal campiunadi mundial da ski nordic a Falun en Svezia. Era en l’equipa svizra hai dà tops e flops, surpraisas e trumpadas, triumfs e tragedias. Top è franc stà Dario Cologna cun la medaglia d’argient en il skiatlon, ina pitschna trumpada il 16avel plaz da Simon Ammann sin la schanza pitschna e la surpraisa positiva l’8avel plaz dad Ueli Schnider en il sprint classic.

21.02.2015

Il campiunadi entschaiva il campiunadi mundial da skis nordic era per Dario Cologna. En il skiatlon vegn currì mintgamai 15 kilometers en il stil classic e 15 km en il stil liber, dastgan ils fans svizzers sperar l’emprima giada sin ina medaglia. Dario Cologna è il defensur dal titel en questa disciplina ed el è era stà campiun olimpic.

20.02.2015

Gievgia è il campiunadi mundial da ski nordic vegnì lantschà per propi cun las cursas da sprint dals umens e da las dunnas. Cun las bleras medaglias èn ils Norvegais ids. Per la Svizra n'hai betg anc dà medaglias, però ina bella surpraisa.

19.02.2015

Cun paucas e trumpettas, ubain cun musica da rock svedaisa da Mando Diao ed in fieu artificial, èsi vegnì dà mesemna saira il sajet da partenza per il campiunadi mundial da ski nordic a Falun en Svezia. La gievgia èsi ì l'emprima giada per medaglias. A partir da las 13:00 per il titel dal campiun mundial en la cursa da sprint. Tranter quests era ils 3 Svizzers Gianluca Cologna, Jovian Hediger ed Ueli Schnider.

Artitgels legids il pli savens