Selecziun Ski Alpin - Sandro Simonet declassà – Elena Stucki directamain en cader B

Il pli aut cader da Swiss Ski è la squadra naziunala. Sin quella suondan ils caders A, B e C. Persunas or dals caders B e C pon adina puspè sa mesirar en cursas da la cuppa mundiala. Sut il cader C datti plirs centers da prestaziun naziunals e caders regiunals.

Tgi decida tge cader?

La decisiun per vegnir en in cader vegn tratga dal directur da Swiss Ski, il schef-trenader ed il schef juniors. Ulteriurs trenaders e manaders dals centers da prestaziun pon dar recumandaziuns. Quai è definì uschia en las directivas da selecziun da Swiss Ski.

Tge vegn evaluà?

Per vegnir en in cader pli aut, ston ins surtut far in: mussar prestaziuns e far puncts. Tut tenor puncts e prestaziuns, era en ils trenaments, vegnan ins partì en in dals caders. Dentant er la biografia d'ina persuna, il svilup corporal, la vegliadetgna e premissas psichicas (sco motivaziun e fermezza mentala) van en la valitaziun.

Exempels concrets per la squadra naziunala u il cader A

Per vegnir en la squadra naziunala ston ins per exempel esser stà en ils emprims 15 da la glista da partenza en ina cursa da la cuppa mundiala ubain far in plaz da podest en ina cursa da la cuppa mundiala.

Per il cader A dovri ubain in plaz da partenza en ils emprims 30 tar ina cursa da cuppa mundiala ubain gudagnar ina medaglia a campiunadis mundials da team.

Tge capita cun atletas ed atlets blessads?

Per vegnir selectà en la squadra naziunala ubain il cader A ston ins ademplir intgins criteris da prestaziun. Per persunas blessadas datti dentant ina excepziun, uschia il reglament da selecziun. Els pon er vegnir selectads senza mussar las prestaziuns.