Podest rumantsch al 34avel maraton da la Surselva a Sedrun. L’anteriur profi Toni Livers oriund da Trun che viva dentant dapi blers onns a Tavau ha gudagnà suveran la cursa da 25 kilometers avant l’Engiadinais Curdin Räz ed il Tuatschin Jon-Fadri Nufer. Uschia ha Livers gudagnà en la vegliadetgna da 40 onns per la 5avla giada quest maraton – in record.
Procurà per la differenza ha Toni Livers sin ils davos kilometers, nua ch’el è vegnì da sa distanziar da l’entira concurrenza. La devisa saja stada da procurar per la decisiun avant ch’i vegnia tar in sprint final, uschia il victur sursilvan.
Rangaziuns 2024
Victoria taliana tar las dunnas
La pli sperta dunna è stada Laura Colombo. Sin la segunda da duas rundas sin la loipa tuatschina è la Taliana anc vegnida da tegnair sin distanza Seraina Boner da Tavau, la partenaria da Toni Livers ch’ha era gia gudagnà trais giadas quest maraton da la Surselva. Cumplettà il podest sco terza ha la finala la Tudestga Sigrid Mutscheller.
Aura da siemi – paucs participants
Tut en tut èn stads a la partenza radund 170 curridras e curriders, in zic pli pauc che tar la davosa ediziun il 2022. L’onn passà avevan ins stuì annullar il maraton da la Surselva pervia da la mancanza da naiv.
Il pitschen dumber da participants dat propi da ponderar. A nus mancan ils curriders da hobi e cunzunt era ils indigens.
Ed er quest onn han la pauca naiv, la plievgia dals davos dis e las autas temperaturas fatg quitads als organisaturs. La finala èn els mitschads cun in egl blau. Las relaziuns èn dentant stadas pretensiusas per ils participants. La loipa era dad in maun fitg sperta, dentant da l'auter maun era fitg schelada.
