Igl è in di spezial per Silvano Beltrametti. Ils 8 da december avant 15 onns ha el cumbattì a l’ur da la pista Oreiller-Killy per surviver. Beltrametti, la nova gronda speranza svizra en il sport da skis, è partì en la cursa rapida cun il numer 14 sco in dals favurits. El aveva enta maun la pista da Val d’Isère. Il di avant era Beltrametti vegnì terz en il Super-G. Era durant la cursa rapida era il skiunz da 21 onn bain sin via.
Cun il meglier temp intermediar cupitga Beltrametti en ina da las pli spertas passaschas insumma. El sgola frontal en la rait da segirezza. Ses skis taglian atras la rait e Beltrametti sa tschenta davos quella, tranter plantas e crappa. Las secundas en il cumbat per surviver cumenzan.
Suenter l’emprim agid al lieu vegn el transportà cun helicopter en l’ospital da Grenoble. La diagnosa: Silvano Beltrametti è sa blessà uschè fitg ch’el resta schirà davent dal 7avel spinal engiu.
Acceptà la situaziun er grazia al sport
Silvano Beltrametti n’è dentant betg crudà en ina rusna. Il skiunz da Lai ha acceptà sia situaziun, ha emprendì dad ir enturn cun sia sutga da rodas, da trair en persuls in t-shirt, ils chalzers, dad ir cun auto, da viver ina vita sco blers auters era. Oz è Silvano Beltrametti um da fatschenta. Ensemen cun sia dunna Edwina maina el il Hotel Tgantieni sur Lai, la pista da skis ch’era ina giada sia vita, passa gist sper l’hotel ora.
RR Actualitad 07:00