Dals 6 fin ils 19 da favrer 2017 organisescha San Murezzan ils 44avels campiunadis mundials da skis, quai gia per la 5avla giada suenter il 1934, il 1948, il 1974 ed il 2003. Il 1948 eran ils campiunadis mundials da skis vegnids integrads en ils gieus olimpics d’enviern.
Occurrenzas grondas a San Murezzan:
- 1928, 1948: gieus olimpics d’enviern
- 1934,1974, 2003: campiunadis mundials da ski alpin
Sper San Murezzan avevan er Äre en Svezia e Cortina d’Ampezzo en l’Italia candidà per quest campiunadi mundial. Tar il congress ils 31 da matg 2012 è Cortina d’Ampezzo sa retratg a curta vista, uschia che San Murezzan ha survegnì quest campiunadi gia suenter l’emprima elecziun. Äre astga persuenter organisar quest eveniment da skis il 2019, quai per la segunda gia suenter il 2007.
Sin buna via
Mez mars 2016 vegn manà atras a San Murezzan il final da la cuppa mundiala da skis. Durant quest final cumbattan mintgamai ils megliers 25 skiunzs en mintga disciplina per las ruclas da cristal. Per San Murezzan è quest final er gist l’emprova generala per il punct culminant dal 2017. Tenor Daniel Schaltegger, il schef da medias dal comité d’organisaziun, sajan els sin buna via. Tut marschi tenor plan, schegea ch'i manchian anc blers detagls. Fitg gida oravant tut, ch’il davos campiunadi mundial a San Murezzan schai be 13 onns enavos.
Il punct culminant
Per ils skiunzs svizzers è il campiunadi mundial da skis a San Murezzan insatge tut spezial. Far furora e gudagnar ina medaglia avant ils fans da chasa, quai è il siemi da mintgin. Oravant tut per ils skiunzs indigens, ils matadors locals sco Sandro Viletta. Il campiun olimpic da Sotschi sa legra e mira cun grond plaschair ed optimissem vers quest campiunadi mundial. En emprima lingia stoppia el dentant vegnir saun, di Viletta ch’ha stuì terminar la stagiun pervia d’ina blessura vid in schanugl.
Il pli gugent dess jau gia uss in stausch e giess da questa plaunca giuadora.
In onn avant il campiunadi mundial ha Sandro Viletta visità la partenza, il «Freier Fall». Era per in skiunz rutinà sco Viletta in mument fitg impressiunant. Ed il pli gugent fissi el gist ì da questa plaunca taissa giuadora, ha Viletta manegià.
Cifras tar il campiunadi mundial da skis 2017
- 06-02 fin ils 19-02-2017: Durada dal campiunadi mundial da ski alpin.
- 6: disciplinas (slalom, slalom gigant, super-g, cursa rapida, super-cumbinaziun, nations team event).
- 12: milliuns francs investids en la renovaziun da l’infrastructura. Tar il davos campiunadi mundial il 2003 era vegnì investì 1 milliarda francs (pista, infrastructura, persistenza).
- 45: grads pendenza a la partenza da la cursa rapida dals umens, il «Freier Fall». En paucas secundas vegnan ils skiunzs sin ins spertadad da 140 km/h.
- 600: dumber d’atlets ord radund 70 differentas naziuns.
- 1856: meters sur mar schai il vitg da San Murezzan.