Il venderdi avevan Schurter Stirnemann surpiglia la testa dal classament general da la cursa en l'Africa dal sid. Ed oz ha tanschì il plaz 3 per cuntanscher la victoria finala.
Il campiun olimpic e mundial Nino Schurter ha gudagnà per l'emprima giada en sia carriera il Cape Epic en l'Africa dal Sid, la pli impurtanta cursa d'etappas en il sport da mountainbike. Ensemen cun ses collega d'equipa Matthias Stirnemann ha il ciclist da la Val Lumnezia gudagnà la cursa dad otg etappas sur var 700 kilometers e varga 14'000 meters differenza d'altezia enturn Cape Town.
Segund, cun in retard da varga otg minutas è il Svizzer Christoph Sauser cun ses collega tschec Jaroslav Kulhavy, terz è Nicola Rohrbach cun ses partenari austriac Daniel Geismayr.
Era plaz da podest per las dunnas
Era tar las dunnas è ina Svizra stada la finala sisum il podest. Esther Süss ha gudagnà ensemen cun la Svedaisa Jennie Stenerhag. Quai cun in avantatg da betg main che 35 minutas. Per Süss èsi gia la terza victoria suenter ils onns 2011 e 2012.
RR sportissimo 17:00