Er quest onn fan millis da fans il viadi a Wengen per esser datiers a quest spectacul da skis sin la pli lunga pista da la cuppa mundiala al pe dad Eiger, Mönch e Jungfrau. Tranter ils fans è quest onn er Mauro Caviezel, l’anteriur skiunz da la cuppa mundiala da Lai.
Avant in onn aveva Caviezel en la vegliadetgna da 34 onns terminà sia carriera a Wengen, quai er in zic sfurzadamain suenter sias grevas blessuras dals davos onns. Tranter auter er’el cupitgà la fin dal 2022 a Lake Louise e gì in trauma da la chavazza e dal tscharvè. Mauro Caviezel è stà fidaivel durant 15 onns a la cuppa mundiala da skis ed ha durant tut quels onns er fatg numerusas curas al Lauberhorn. Per in plaz sin il podest a Wengen n’hai mai tanschì, dentant tschintg giadas ha el cuntanschì là in plaz sut ils top 7, duas giadas en la cursa rapida e trais giadas en la cumbinaziun alpina.