L’emprim hai tutgà il slalom gigant sin il glatscher da Sölden, lura las duas cursas rapidas a la premiera a Zermatt/Cervinia e la davosa fin d’emna han er las trais cursas, duas rapidas ed in super-G, a Beaver Creek stuì vegnir annulladas pervia da l’aura. Il pli savens è il ferm vent stà il grond problem. Da las emprimas set cursas dals umens en questa stagiun ha sulet il slalom a Gurgl en l’Austria pudì vegnir manà atras. Marco Odermatt e collegas spetgan uschia vinavant sin l'emprim resultat ed ils emprims puncts da la stagiun 23/24.
Tut quellas annullaziuns fan, en vista al chalender da la cuppa mundiala, er quittads als organisaturs da la FIS. Prender suenter tut las cursas n’è strusch pussibel. Ina da las cursas rapidas da Zermatt/Cervinia vegn manada atras mez december a Gröden en l’Italia, quai è gia fix. Uschia restan anc quatter cursas spertas che stuessan chattar in suttetg. Tenor Markus Waldner, il directur da cursas da la FIS, è pussibel che Wengen e Kvitfjell en la Norvegia survegnan anc ina cursa rapida supplementara.
Vinavant cun la cuppa mundiala da skis dals umens vai la proxima fin d’emna, ils 9 e 10 da december, a Val d’Isère en Frantscha. Là stattan sin il program in slalom gigant ed in slalom.
