Triumfà ad Araxa ha Simon Andreassen. Il mountainbiker dal Danemarc ha dentant er profità da problems tecnics tar il Franzos Victor Koretzky ch’ha attatgà intginas rundas avant la fin e ch’era sin buna via da gudagnar. La finala è Koretzky vegnì segund. Cumplettà il podest sco terz ha il Sidafrican Alan Hatherly ch’ha battì Filippo Colombo per paucs centimeters. Tar l’emprima cursa in’emna avant a Mairiporã era Colombo anc vegnì terz.
Cun Nino Schurter sco 6avel ha anc in segund svizzer cuntanschì in plaz sut ils top 10. Schurter è ditg stà en la gruppa da testa. Cura che Koretzky ha però augmentà il tempo n’ha il Lumnezian betg pudì restar sin ils chaltgogns al quartet da testa.
Il podest dals umens:
- Simon Andreassen (Danemarc) 1:20:00 uras
- Victor Koretzky (Frantscha) +0.01 secundas
- Alan Hatherly (Africa dal Sid) +0.01 secundas
Stuì magunar in’ulteriura terrada ha Mathias Flückiger ch’ha cuntanschì l’arrivada be sco 21avel e sto uschia tremblar per ina nominaziun per ils gieus olimpics a Paris. Là pon be dus Svizzers ir a la partenza. Anc avant Flückiger è Luca Schätti classà sco 19avel. Plinavant è Thomas Litscher vegnì 26avel e Timon Rüegg 28avel. Ina cursa d’emblidar èsi stà per Lars Forster sco 31avel. Insumma betg sin turas è vegnì Vital Albin. Sco gia a Mairiporã ha il mountainbiker da Tersnaus er stuì sa cuntentar ad Araxa be cun il 75avel plaz.
Alessandra Keller manchenta il podest
En la cursa da cross-country da las dunnas han las Svizras persvadì sco equipa. Cun Alessandra Keller sco quarta, Jolanda Neff 6avla, Nicole Koller 7avla e Linda Indergand 10avla èn gist quatter da sis svizras classadas sut las top 10.
Keller è stada ditg en la gruppa da testa. A la fin han però las forzas mancà per cumbatter per in ulteriur plaz da podest. Sin quel èn las medemas trais mountainbikeras sco gia tar l’emprima cursa a Mairiporã. Questa giada ha dentant gudagnà l’Americana Haley Batten avant la Svedaisa Jenny Rissveds e Savilia Blunk, medemamain americana. Per Haley Batten èsi l’emprima victoria en la cuppa mundiala.
Ginia Caluori persvada er ad Araxa
Suenter il segund plaz a Mairiporã ha Ginia Caluori da Panaduz manchentà be per pauc in podest ad Araxa en la cursa da cross-country da las dunnas U23. Caluori è vegnida quarta. Gudagnà ha sco gia in'emna avant la Tudestga Kira Böhm. E tar ils umens U23 e il Svizzer Finn Treudler vegnì segund davos l'American Riley Amos.
Cumbat per in plaz da partenza a Paris
La proxima cursa è ils 26 da matg a Nové Mesto en la Tschechia. Suenter questa cursa vegn Swiss Cycling a far la nominaziun per ils gieus olimpics a Paris. Las meglras cartas han il mument tar las dunnas Alessandra Keller e Jolanda Neff, tar ils umens pudessan Nino Schurter, Filippo Colombo e Mathias Flückiger cumbatter per ils dus plazs da partenza.
