Las dunnas da club da ballape da Servette-Chênois – han gudagnà la cuppa svizra. En il Letzigrund a Turitg han ellas battì las dunnas dals Young Boys cun 3:2.
Las giugadras da Servette Chênois gudognan sco l'onn passà la cuppa svizra. Las Genevrinas gudognan en il final a Turitg cunter YB cun 3:2.
Be 3 minutas suenter vegnir sin il plaz ha la Lituana Rimante Jonusaite sajettà en la 68avla minuta il 3:2. La giugadura ch'è vegnida l'enviern tar Servette ha l'emprim ina giada blamà la defensura bernaisa Leana Zaugg cun ina rotaziun ed alura la golia Jara Ackermann cun in sajet en la crusch da la latta.
Era sche Servette ch'era vegnì l'onn passà per l'emprima giada victur da la cuppa, è ì en il final sco favurit, è YB stà ditg il team pli activ. Duas giadas han las Bernaisas, ch'èn vegnidas trenadas da la tudestga Imke Wübbenhorst, pudì egualisar entras Naomi Luyet: en la 6avla minuta tar il 1:1 e curt avant la pausa suenter in bal cun il chau al 2:2.
Displaschaivel è ord vista dad YB – ch'ha gia gudagnà la cuppa 15 giadas –, oravant tut stà il segund gol da Servette. La svedaisa Therese Simonsson ha tutgà ord posiziun d'offside. Perquai che naginas arbitras da video èn stadas en acziun n'han ins betg pudì curreger il sbagl.
Disfortuna ha YB era gì en la 57avla minuta, nua ch'igl han mancà per stgars il 3:2. La capitani Stephanie Waeber ha tutgà cun in bel culp liber be la latta – tuttina sco in pau pli tard da l'autra vart era la Genevrina Cassandra Korhonen.