Tenor in studi da l’UBS megliereschia il pachet da refurma da l’AVS 2020 la finanziaziun da las rentas. A medem temp daventia però il tractament malgist da las generaziuns tras la refurma pli grond.
Surtut la generaziun pli giuvna vegnia a purtar il pais da la sanaziun. E las annadas ch’èn curt avant la pensiun fissan cun la refurma meglier vidlonder. Quai ha constatà l’UBS tant tar la proposta da refurma per l’emprima pitga, l’AVS, sco era per la refurma per la segunda pitga, las cassas da pensiun. Il suveran svizzer votescha il settember davart la refurma da l’AVS.
Generaziun sur 50 sa participescha dapli a votaziuns
En general vesa l’UBS che la generaziun pli veglia vegn favurisà cun la refurma dapli che la generaziun pli giuvna. Considerond che surtut la generaziun sur 50 sa participescha a votaziuns sa dumonda la UBS sche la democrazia directa è capabla da schliar las sfidas da la vegliadetgna cun resguardar gistamain las generaziuns.
RR novitads 12:00