Siglir tar il cuntegn

Header

cuntegn

Svizra Trend da votaziuns - 1 x na e 3 x avert

Sche las votaziuns dal zercladur fissan stadas ils 28 d'avrigl, avessi dà per l'iniziativa davart la taglia sin l'ierta in na, tar ils auters projects n'avessi dà naginas maioritads.

Na a la «iniziativa davart la taglia sin l'ierta»

video
Trend da votaziuns
Or da Telesguard dals 08.05.2015.
laschar ir. Durada: 2 minutas 12 Secundas.

Il suveran avess refusà l'iniziativa davart la taglia sin l'ierta cun 51% da las vuschs - 38% avessan ditg gea, sche la votaziun fiss stada la fin d'avrigl. Cunquai ch'il process da la furmaziun d'opiniun è quasi terminà, quinta l'institut da perscrutaziun gfs.bern cun in na ils 14 da zercladur.

La retschertga

Avrir la box Serrar la box

Sin incumbensa da la SSR ha l'institut da perscrutaziun gfs.bern dumandà 1'212 votantas e votants cun domicil en Svizra, tge ch'ellas vegnian a votar tar ils projects dals 14 da zercladur. Tranter ils 27 d'avrigl ed ils 2 da matg ha l'institut fatg la retschertga. La toleranza dal resultat è tar +/- 2.9%.

Ina decleraziun perquai è ch'ins discurra gia dapi pli ditg sur da questa taglia. Perquai che la taglia avess in effect retroactiv e pertutgass era iertas dapi l'onn 2012, han blers gia reagì e fatg iertas a lur uffants. Quai ha procurà per rapports en las medias. Uschia haja la gronda part dals votants gia fatg si'opiniun.

Trend da na a «l'iniziativa davart ils stipendis»

L'iniziativa davart ils stipendis fiss vegnida acceptada la fin d'avrigl cun 49% da las vuschs - 37% l'avessan refusà. Nagina vart n'avess damai cuntanschì ina maioritad.

Il trend per la votaziun mussia dentant tuttina envers in na, ha declerà il politolog Claude Longchamp da l'institut gfs.bern. Tar iniziativas dal pievel mussia l'experientscha che l'opposiziun creschia tendenzialmain, pli datiers che la data da votaziun vegnia, entant che l'acceptanza stagneschia.

Nagin trend per «LRTV» e «diagnostica da preimplantaziun»

audio
Saira: Trend da votaziuns - in na e trais tendenzas avertas
ord Actualitad dals 08.05.2015.
laschar ir. Durada: 4 minutas 3 Secundas.

Tar la revisiun da la lescha federala davart radio e televisiun (LRTV) e tar il conclus davart la diagnostica da preimplantaziun na ristga la retschertga betg da far ina tesa per in resultat. Tant in gea sco er in na sajan pussaivels.

Tar la lescha da radio e televisiun vegnia quai a giugar ina rolla decisiva, tge tenuta ch'ils votants han vers las autoritads; concret vers il cussegl federal ed envers l'instituziun SRG SSR. Tgi che haja fidanza, vegnia tendenzialmain a votar gea; tgi che ha saja disfidant vegnia tendenzialmain a metter in na en l'urna. I vegn damai ad esser decisiv, da tgenina vart ch'i vegn a gartegiar meglier da mobilisar.

Sumegliant vesi ora tar il conclus davart la diagnostica da preimplantaziun. Era là n'èsi sin basa da la retschertga betg pussaivel da tematisar resultats, en tge direcziun che la votaziun pudess ir. I vegn ad esser decisiv, sch'ils tradiziunalists ubain ils modernists vegnan a sa metter tras en il cumbat da votaziun.

Artitgels legids il pli savens