L'organisaziun Swissgrid discurra en ses rapport da sfidas sin il martgà d'energia europeic e dals sforzs per segirar il provediment d'energia en Svizra. I haja gì num da procurar che las ovras idraulicas tegnian reservas e lura er integrar en la rait svizra l'ovra da reserva a Birr. Vitiers ha il gestiunader da la rait svizra er sviluppà in sistem da controlla per constatar ad uras mancanzas d'electricitad.
Custs creschids han er effect sin las tariffas
Las chasadas ston il 2024 pajar taxas passa dubel uschè autas a Swissgrid. Per ina chasada media (cun in consum annual da 4'500 uras kilowatt) s’augmenta il quint da 70 sin 146 francs. En quel vegn resguarà per l’ina las reservas per l’enviern, per l’autra ils custs d’acquisiziun pli auts.
Il gudogn da Swissgrid è sa sminuì il 2022 per var 10% sin 96 milliuns francs cumpareglià cun l'onn avant.