En la zona industriala «Schweizerhalle» a Pratteln en il chantun Basilea Champagna hai il venderdi passà dà in incident cun chemicalias: Clorid d’acetil saja vegnì liber. In defect tecnic saja stà la culpa che chlor d'acetil ha pudì sortir il venderdi passà tar la firma Cabb a Pratteln. In element da pumpa haja gì ina sfessa, ha ditg il manader da la partiziun Uwe Müller davant las medias. Daco che quel è rut, vegnia anc intercurì. La firma haja examinà quest element la davosa giada il december passà e n'haja constatà naginas irregularitads. Era la procura publica dal chantun Basilea-Champagna investighescha il cas.
Da l’incident haja ni dà in fieu ni sajan persunas vegnidas blessadas. Radund 200 pumpiers sajan stads en acziun. Las autoritads avevan avertì la populaziun da l’entir chantun da serrar portas e fanestras e da restar a chasa durant la notg. Suenter radund sis uras hajan ils pumpiers gì sut controlla la situaziun, uschia che l’alarm saja vegnì abolì.
