Referì han Annetta Ganzoni, Rico Valär e Renzo Caduff davart tematicas da la litteratura e cultura rumantscha. Quai avant stgars 50 persunas ch'èn sa rimnadas en ina da las numerusas salas da l’Universitad da Turitg. Tranter auter students, commembers da la cumissiun per la nominaziun ed auters interessads.
Ils dus candidats e la candidata han en lur referats tractà concretamain lur lavurs scientificas.
Rico Valär – Poesias da differents linguatgs romans
En il referat da Rico Valär è la poesia engiadinaisa «Chara lingua da la mamma» stada en il center. La poesia che tracta il linguatg matern rumantsch ha Valär cumpareglià cun poesias dad auters linguatgs, sco per exempel il galician ubain il catalan. El ha constatà ch'il linguatg matern vegnia ludà, gea schizunt glorifitgà en tut questas poesias.
Annetta Ganzoni – La prosa dad Andri Peer
Annetta Ganzoni ha dà al public in’invista en las ovras e la vita da l'autur Andri Peer. En spezial ha ella tractà la prosa che l'Engiadinais ha scrit durant passa trais decennis. Ganzoni ha mussà exempels, co Peer descriveva en in linguatg elevà e cumplex sia patria, ils culms ed ils Engiadinais.
Renzo Caduff – La maschaida da linguatgs en ovras sursilvanas
Renzo Caduff ha preschentà, co il rumantsch ed il tudestg vegnan en contact en las ovras da Leo Tuor ed Arno Camenisch. Lur texts mussian bain, co il rumantsch sursilvan vegnia influenzà fitg dal tudestg. Tranter auter ha el illustrà quai cun exempels ord ils cudeschs «Giacumbert Nau» da Leo Tuor e «Sez Ner» dad Arno Camenisch.
RR actualitad 8:00
