Siglir tar il cuntegn

Header

cuntegn

Svizra Nagin basegn da far controllas sin il cunfin svizzer

Pervi da la gronda fulla da fugitivs han la Germania, l'Austria, la Slovachia e per part era l'Ollanda reintroducì las controllas al cunfin.

La Germania controllescha era il cunfin cun la Svizra e la Frantscha. La Svizra perencunter spetga giu. Il mument saja la situaziun sin il cunfin en la Svizra da l’ost ruassaivla. I dettia in zic dapli migrants ch'uschiglio, communitgescha l'Administraziun federala da duana.

Blers dumondan asil

Bler dapli migrants dettia en la Svizra dal sid, la situaziun saja dentant sut controlla. Dal schaner fin l'avust han las guardias da cunfin registrà en l'entira Svizra passa 16'000 persunas ch'èn vegnidas sur cunfin senza visum u senza pass. Quai èn gia ussa 2'000 dapli che durant l'entir onn 2014. La gronda part da quellas persunas dumonda lura asil.

audio
La Svizra spetga giu da puspè introducir controllas da cunfin.
ord RTR Audio dals 14.09.2015.
laschar ir. Durada: 1 minuta.

La Svizra anc senza controllas

Il mument na dettia nagin motiv d'introducir puspè las controllas da cunfin, scriva la confederaziun. Tenor la cunvegna da Schengen possian ins far gliez mo sche l'urden public saja disturbà grevamain. Gliez na saja betg il cas.

Controllas a la duana dettia vinavant sco gia avant la cunvegna da Schengen, ed en connex cun talas dettia era controllas da persunas.

Iniziativa per reintroducir controllas

La PPS giuvna Svizra ha communitgà il glindesdi, da vulair lantschar in'iniziativa dal pievel per reintroducir las controllas da cunfin. Ella vul far quai ensemen cun l’Acziun per ina Svizra independenta e neutrala AUNS e cun l’organisaziun «sifa – segirezza per tuts!».

audio
Saira: Per la AUNS ha l’idea d’ina Europa senza controllas da cunfin fatg naufragi
ord Actualitad dals 14.09.2015.
laschar ir. Durada: 1 minuta 37 Secundas.

Artitgels legids il pli savens