Tschintg chantuns han dumandà da dastgar eliminar entirs trieps u regular trieps tenor la nova ordinaziun da chatscha. L'Uffizi federal d'ambient Bafu ha annunzià che tuts dastgan proceder, er il chantun Grischun.
Mo il Tessin n'ha betg la lubientscha d'eliminar il triep da la Valle Onsernone. I na saja betg cumprovà che quel haja attatgà en ils davos 12 mais animals da niz protegids.
Il Grischun ha glisch verda per ses plans d'eliminar quatter trieps, e regular dus ulteriurs. Da sajettar mintgamai dus terz dals lufs pitschens dals trieps da Moesola e Valgronda ha il Bafu gia lubì pli baud.
Il chantun ha la pussaivladad da sajettar ils lufs dal prim da december enfin la fin dal schaner. En tut po el uss sajettar 44 lufs e lufs pitschens, sco ch'el ha annunzià en ina communicaziun en chaussa. En tut dettia en il Grischun en il mument 130 lufs.
Il Bafu scriva, ch'i na saja betg da spetgar che tut las disposiziuns da sajettar pon vegnir ademplidas quest enviern. Ed er il chantun Grischun di ch'i saja grev da far prognosas. I manchia l'experientscha d'ir a chatscha sin entirs trieps.
Sajettar ils lufs dastgan guardaselvaschina sco era chatschadurs cun ina scolaziun speziala. En quai connex vul il chantun organisar sairas d'instrucziun en trais regiuns. La chatscha sin ils lufs cumenza il prim da december e cuntinuescha enfin ils 31 da schaner.
Chatscha sin lufs en Svizra
Er sch'il Tessin na dastga betg eliminar l'entir triep da la Valle Onsernone, po el sajettar dus terz dals lufs pitschens. Il medem dastga il chantun far cun ils trieps da Carvina e Val Colla, ha ditg il Bafu.
Er il Vallais ha tschentà dumondas per eliminar trieps, e po proceder ed eliminar tuts set, scriva il Bafu. En il chantun Son Gagl dastga il triep da Calfeisen vegnir eliminà, il sulet triep dal chantun. Il chantun Vad ha glisch verda per regular il triep da Mont Tendre.
Tenor il Bafu po quai franar la creschientscha da la populaziun dal luf en Svizra.
Uniuns per la protecziun dal luf han fatg recurs
Tenor las organisaziuns per la protecziun dal luf «CHWolf» e «Avegni Loup Lynx Jura» na saja la midada da l'ordinaziun betg cumpatibla cun la Cunvegna da Berna. La cunvegna vul mantegnair las plantas ed animals selvadis en l'Europa, la Svizra ha ratifitgà quella.
L'organisaziun Avenir Loup Lynx Jura ha inoltrà in recurs tar il Cussegl da l'Europa. Quella saja vegnida acceptada da las instanzas a Strassburg, sco la organisaziun communitgescha.
