Il Cussegl naziunal propona da dir na a l'iniziativa RASA. La chombra gronda na vul plinavant nagina cuntraproposta tar l'iniziativa che vul annullar l'iniziativa d'immigraziun da massa.
Rasa è ina reacziun sin l’iniziativa d’immigraziun acceptada il 2014 e munta «Raus aus der Sackgasse». Finamira da l’iniziativa è da mantegnair ils contracts bilaterals cun l’UE. Ella vul stritgar l’artitgel en la constituziun senza remplazzament. Ella è vegnida inoltrada l’october 2015 cun 110’000 suttascripziuns.
Cun 125 encunter 17 vuschs e 50 abstenziuns ha il Cussegl naziunal decis da refusar l’iniziativa RASA «vegnir ord las stretgas». La finamira principala da l’iniziativa saja gia cuntanschida, argumenteschan divers cussegliers naziunals da tut las partidas. Tranter auter da mantegnair ils contracts cun l'Uniun europeica.
Ils iniziants avevan temì che quai na saja betg pli pussaivel cun l’iniziativa d'immigraziun da massa. A la politica èsi dentant reussì da chattar ina soluziun che lubescha da mantegnair ils contracts, quai cun il privilegi per indigens sin il martgà da lavur.
La gronda part dals parlamentaris spera ch'ils iniziants tirian enavos l’iniziativa RASA. Ils iniziants na vulan però betg retrair quella sch'i na dat nagina cuntraproposta.
