Il Cussegl federal vul far pli segirs ils centers federals per requirents d’asil. Concret duajan las cumpetenzas vegnir regladas cleramain. Pia tgi che dastga far diever da mesiras disciplinaras sin tge basa. Quai suenter ch’igl ha dà rinfatschas cunter il persunal da segirezza en tals centers. Il Cussegl federal ha approvà da midar la lescha d’asil en quest senn. La fatschenta va uss en il parlament.
Cun la fatschenta vul la regenza augmentar la segirezza dal manaschi en ils centers d’asil federals per collavuraturs ed era per ils requirents e las requirentas d’asil. L’anteriur derschader federal Niklaus Oberholzer aveva recumandà l’atun 2021 diversas mesiras.
Per crear ina clera basa legala duain da nov vegnir regladas las incumbensas las pli impurtantas dal Secretariat da stadi per la migraziun (SEM) en ils centers d’asil federals sco er a las plazzas aviaticas en la Lescha d’asil. Latiers tutgan per exempel l’alloschament e l’assistenza da las requirentas e dals requirents d’asil. La finala duai vegnir reglada la pussaivladad da tegnair enavos temporarmain ina persuna durant maximalmain duas uras per defender in privel serius.
