«Safer Sex» – Tgi ch’auda quai chavazzin patratga probabel l’emprim vi da la prevenziun cunter SIDA e vi da preservativs e condoms. E quai saja oriundamain era stada l'idea da Safer Sex, di Anne Levy, la directura dal Uffizi federal da sanadad. Oz na saja il focus da «Safer Sex» betg pli usche ferm sin HIV mabain cunzunt era sin autras malsognas che pon vegnir transmessas durant il sex. Sifilis, gonorrea, clamidias ni era hepatitis.
«Cuntrari a las infecziuns da HIV, nua ch’ins observa dapi passa 30 onns che quellas van anavos massivamain èn las autras infecziuns creschidas ils ultims 30 onns. Nus avain era observà che la populaziun n’è betg bain infurmada. La populaziun sa ch’ella po sa proteger cun in preservativ da HIV mo ella na sa betg che quai na tanscha betg tar autras malsognas sexualmain transmissiblas.»
Campagna Love Life 2024
Infecziuns cun clamidias quatter giadas pli autas
E quai fatg sa mussa era ella statistica. Entant ch'il dumber d'infecziuns cun HIV è ì enavos da circa 2000 per onn l'entschatta dals onns 1990 sin actualmain pli pauc che 400 èn las infecziuns cun clamidias creschidas il medem temp da circa 3000 sin oz passa 12'000 infecziuns.
I dovria perquai dapli infurmaziuns davart quellas malsognas, uschia il facit da la directura dal BAG. E qua duai la novissima campagna da Love Life cun il titel «Ready! Fai tes check da Safer Sex!» tutgar la noda.
«Avant che jau vom ad in date ni ch’jau inscuntrel insatgi fatsch jau quai check. Jau dun en quant viglia che jau sun, tge che jau spetg da la saira e sinaquai survegn jau cussegls individuals co jau duai agir, sin tge che jau duai guardar e co jau ma pos proteger. Era sche jau duai ma laschar testar e co jau pos ma laschar tractar sche jau ma sun tuttina infectada.»
Testar interrumpa las chadainas d'infecziun
La purschida è anonima e simpla. E sin la pagina internet chatt’ins sper infurmaziuns davart las malsognas e co ins po sa proteger dad in'infecziun era ils posts da cussegliaziuns e da test, nua ch'ins chatta dapli agid.
Insumma: sa laschar testar saja in punct central da l'entira campagna, di Anne Levy.
«Sche nus vulain cuntanscher la finamira èsi absolutamain central ch’ins va a sa laschar testar sch’ins ha il sentiment da esser s’infectà cun ina tala malsogna per evitar che quai va vinavant. La buna nova è ch’ins po tractar quai.»
Enfin il 2030 duai uschia dar naginas infecziuns novas da HIV e da hepatitis e tar tschellas malsognas duai il dumber d'infecziuns novas vegnir sbassads massivamain. Ina finamira ambiziusa, conceda era la directura dal BAG. Mo gist las cifras d'infecziuns cun HIV mussian tge che saja pussaivel.
«Sche nus faschain ussa anc ina giada in grond effort essan nus persvas che nus vegnin d’eliminar tut quellas infecziuns enfin il 2030. »
E per quella finamira investescha la Confederaziun 1,2 milliuns francs. Daners che sajan bain investids, di Anne Levy. La sanadad pertutgia nus tuts.