El prevesa tranter il Lago di Poschiavo ed il Lago Bianco ina nova ovra d'accumulaziun a pumpa cun ina prestaziun installada da 1’000 megawatts.
Ils stgalims existents Cavaglia e Robbia sco er Campocologno duain vegnir engrondids l'emprim e manads vinavant suenter l'engrondiment. L'implant electric existent Palü vegn a crodar davent.
En sia communicaziun argumentescha la regenza, ch’il project haja ina gronda impurtanza concernent la politica e l'economia d'energia e quai «betg sco ultim er en il rom da la strategia d'energia 2050 da la confederaziun».
La Repower è cuntenta,
na vul dentant anc betg fabritgar
Il concern d’energia Repower SA beneventa en ina reacziun scritta la decisiun da la regenza. Pervi da la situaziun actuala sin il martgà d’energia na vegnia l’ovra dentant anc realisada. En sia communicaziun scriva Repower ch’ella haja infurmà gia pliras giadas ch’il project na saja il mument betg realisabel pervi dals pretschs bass da forza.
Era il concern d’energia suttastritga l’impurtanza naziunala dal project Lagobianco areguard la strategia d’energia 2050 da la Confederaziun.
