Betg mo ella, mabain ils blers dal vitg sajan encunter la midada da zona tar il territori dalla plazza aviatica, precisescha la presidenta communala, Nicoletta Noi-Togni. Ins haja gia ina surfatscha da 180'000 meters quadrat che vegnia utilisada sco zona d' industria. Ch' i dessia uss anc dar ina zona d' industria ch' è pli gronda che l' existenta na vesi ella betg en.
La concentraziun da particlas finas è auta e surpassa regularmain la limita. Uschia survegnissan nus anc dapli traffic, camiuns e cunfinaris da l' Italia. Quai na vegn betg en dumonda.
Concretisar intenziuns
Per il chantun è uss il proxim pass, da chattar ora nua che la vischnanca vul vairamain ir cun il project, sco quai ch' il cusseglier guvernativ, Jon Domenic Parolini declera. Perquai haja igl uffeci per economia e turissem uss prendì si il contact cun la vischnanca da San Vittore. L' idea saja d' avair in inscunter cun ils exponents dalla vischnanca da San Vittore uschè spert sco pussibel.
Sch' il cussegl communal da San Vittore ha tut autras intenziuns, ston el concretisar quellas ed empruvar da manifestar quellas. Cun quai era integrar lur intenziuns en il plan directiv regiunal dalla Mesolcina.
En il plan directiv saja numnadamain fixà, che l'areal duess esser ina zona da plazzas da lavur d' impurtanza chantunala.
RR actualitad 12:00