ll center da cumpetenza per scrinaris «Centro Tecnologico del Legno» a Poschiavo sto capitular suenter dus onns. En il futur vegnan ils students puspè instruids en la scola professiunala dal lieu. Quai rapporta la gasetta «Il Grigione Italiano». L'edifizi ch'era vegnì construì per radund tschintg milliuns fr. ha servì mo stgars dus onns al center da cumpetenza.
Auts custs fixs e marcantamain damain students che planisà, han sfurzà il cussegl d'administraziun a quest pass. Ins na possia dentant tuttina betg discurrer d'in naufragi. Il project vegnia ussa redimensiunà. Per il bajetg sper la staziun da Poschiavo tschertg'ins in cumprader.
Il chantun deplorescha - indizis haja dà gia avant in onn
Il chantun ha contribuì totalmain 660'000.-- fr. en il CTL. Entras la nova politica regiunala han ils iniziants plinavant survegnì in emprest dad 1,5 milliuns francs davart da la Confederaziun. Quest emprest stoppia il Center da cumpetenza pajar enavos, uschia cusseglier guvernativ Jon Domenic Parolini. Plinavant spetga il chantun davart dals responsabels in'analisa detagliada cun las raschuns per il naufragi.
RR novitads 07:00