Persunas singulas ed interpresas pitschnas e mesaunas survegnan agid immediat da totalmain 260'000 francs, communitgescha la Chadaina da fortuna. La reparaziun dals donns a Bondo custia a la vischnanca milliuns francs. Cunquai ch'il fond "malauras svizra" na possia betg cuvrir quests custs vegn avert in conto spezial per Bondo.
Ina sbrinzla speranza per Bondo
Sco la presidenta communala Anna Giacometti ha ditg saja la decisiun da la Chadaina da fortuna ina sbrinzla speranza en quests temps grevs. Grazia a las infurmaziuns ch'ins haja survegnì durant la visita a Bondo possia vegnir gidà effizient e cun cleras directivas, ha ditg il directur da la Chadaina da fortuna Tony Burgener.
Donaziuns pon vegnir fatgas sin la pagina d'internet da la Chadaina da fortuna. Ni sut il conto da posta 10-15000-6 cun la remartga "Bondo".
RR novitads 10:00