Arosa vul profitar da la purschida e dal renum che Lai ha en la scena dals mountainbikers. I saja perquai in pass logic da colliar meglier ils dus territoris, declera Pascal Jenny, il directur dad Arosa Turissem.
Sendas e flow-trails
Per ina buna colliaziun tranter Arosa e Lai stoppian ins surtut optimar la situaziun enturn il Corn Cotschen (Rothorn) vers il Gredigs-Fürgli. Ed era la ruta giu dal Hörnli duai vegnir renovada: Planisà è in uschenumnà flow-trail da 10 kilometers che duai remplazzar il tschancun da downhill.
Aifer quellas adattaziuns veglian ins era gist separar las sendas per mountainbikers da quellas dals viandants. Quai saja impurtant da prender a mauns per evitar conflicts, di il directur da turissem Pascal Jenny. Pertge tenor la lescha hajan tant bikers sco viandants il dretg da nizzegiar las sendas.
«Quai dat anc dapli disturbis»
La Pro Natura è s'exprimida gia ordavant critic envers il project per las sendas da mountainbike. Renata Fulcri tema ch'i dettia ussa era la stad dapli truscha sin las muntognas. Gia l'enviern dettia conflicts pervia da las zonas da ruaus.
Separar las vias per bikers da quellas dals viandants fetschia mo senn sin vias existentas. En il concept da bike dal Grischun saja fixà cleramain che bikers e viandants duain nizzegiar las medemas sendas - uschiglio dettia dapertut novas vias e novs trutgs en las muntognas.
Arosa decida a l'urna
Il suveran d'Arosa decida dumengia davart il project, che custa bun 900'000 francs e che vegn finanzià per gronda part ord la taxa sin abitaziuns secundaras. Ils responsabels vulan cumenzar a bajegiar quest'atun - uschia che las novas sendas per mountainbikers e viandants fissan prontas la stad 2018.
RR actualitad 07:00