Suenter intgins obstachels, tranter auter er ina protesta encunter il project da construcziun, han uss las lavurs da sdrappar giu cumenzà. Cunzunt da la vart da la Steinbockstrasse pon ins vesair ch'i va insatge. Plirs exchavaturs èn en acziun per stgarpar giu ils bajetgs a la via da la staziun.
Dus onns preparaziun
Il 2015 aveva l'Axa Winterthur confermà ch’ins veglia bajegiar a la staziun da Cuira. Midadas da project, dispitas cun vischins e partenaris han entardà il project. L’october 2016 eran lura la finala l’inizianta Axa Winterthur vegnida d’accord cun la Foppa Finanz SA e la planisaziun dal project da partenaris è vegnida serrada giu.
