In dals puncts culminants da las festivitads da 500 onns Refurmaziun a Glion è la dumengia da Tschuncaisma: En la Baselgia da sontga Margareta vegn festivà il servetsch divin evangelic-refurmà. Pli extraordinari è, che quai servetsch divin vegn celebrà en trais linguatgs: En rumantsch, tudestg e talian.
Ed anc pli spezial...
Il servetsch divin vegn er emess directamain en la televisiun, numnadamain sin SRF1, RSI e RTS. Sin tut ils canals mintgamai cun ina translaziun simultana.
La translaziun dovri, perquai che Ser Jan-Andrea Bernhard, il plevon da Vuorz e Schnaus, fa ses predi per rumantsch. El vegn accumpagnà da la plevonessa da Glion Maria Wüthrich.
Cumpareglià cun ina dumengia ordinaria èn las preparaziuns per quest predi prest in auter mund.
Che gist Ser Bernhard ha la quaida da far quai predi la dumengia ha da far cun il fatg, ch'el maina la gruppa da lavur REFO 500. Quella organisescha a Glion las festas en connex cun il giubileum da 500 onns refurmaziun.
In'anecdota tar il predi
Cur che Ser Bernhard ha preparà ses predi, ha el scrit quel per rumantsch ed inoltrà quai a SRF. Da Turitg ha el alura survegnì il resun, ch'el stoppia dar giu il text scrit per tudestg, e betg per rumantsch. Mo uschia possian els far la translaziun per talian e franzos.
RR actualitad 07:10