Ils 22 d'october 2023 ha il suveran da Mustér gì da decider sch'el vul da principi laschar realisar la producenta d'electricitad Axpo e las pendicularas da Mustér in'ovra solara sin l'Alp Magriel. Cunquai ch'il cussegl da vischnanca ha ditg venderdi saira Gea al contract per il dretg da construcziun tranter la vischnanca e las investuras, ha il suveran da decider ils 14 d'avrigl 2024 a l'urna davart quest dretg ch'è il proxim pass en la procedura.
Ovra pli gronda senza participaziun da la vischnanca vid la SA
Il plan per realisar l'ovra solara en il territori alpin sur Mustér è sportiv: La dumonda da bajegiar vulan ils responsabels inoltrar suenter ch'il suveran ha decidì a l'urna, pia en il segund quartal da quest onn. Tenor ils planisaders na duain ils panels da solar betg vegnir construids sin uschenumnadas «maisas», mabain vegnir stendids sin ina construcziun da sugas. Plinavant daventa il perimeter dal project pli grond, cunquai che las construcziuns dovran dapli plaz e perquai ch'ils planisaders han stuì excluder ina zona per motivs d'ambient. La surfatscha totala munta ussa 140'000 meters quadrats enstagl da 98'000 meters quadrats. Il cussegl da vischnanca ha dumandà la suprastanza communala da far transparent ed argumentar questas midadas en il messadi per las votaziuns a l'urna dals 14 d'avrigl 2024.
Plinavant na quinta la vischnanca betg da sa participar vi da la societad d'aczias Ovra solara Magriel AG. Planisà è che l'Axpo Solutions AG e las Pendicularas da Mustér SA daventan acziunarias cun cumparts da 60% e 40% vi dal chapital. Ina participaziun da la vischnanca giess sin donn e cust da las pendicularas, scriva la suprastanza communala en ses messadi. Plinavant haja la vischnanca in sez en il cussegl d'administraziun da la nova SA ed ina participaziun vi dal gudogn senza stuair prender enta mauns meds finanzials, uschia il president communal da Mustér, René Epp. Ina eventuala participaziun n'è alura betg vegnida tematisada en la sesida da venderdi saira, quest punct na vegn pia betg davant il pievel ils 14 d'avrigl.
Sche la populaziun vuless sa participar vi dal chapital avess quai gia stuì esser ina tematica durant la sesida dal cussegl.
Concessiun dal dretg d'aua vegn anc ina giada discutada
La suprastanza communala ha suttamess il contract da concessiun dal dretg da las auas tranter la vischnanca da Mustér e las Pendicularas Mustér SA. Quest messadi duai anc ina giada vegnir precisads avant suttametter la fatschenta a las votantas ed ils votants, quai sin giavisch dal cussegl da vischnanca.
