Las duas ovras solaras sin intschess communal da Mustér han pliras differenzas. Uschia n’è l’ovra solara gronda sin l’Alp Run betg sin terren da la vischnanca da Mustér, mabain sin terren en possess da la societad simpla Alp Run. L’autra ovra solara Magriel, en il territori da skis da Mustér, percunter è planisada sin terren en possess da la vischnanca. Era ina differenza datti en l’indemnisaziun da la vischnanca.
Uschia han ins contractà cun ils iniziants da l’ovra solara sin l’Alp Run da survegnir per kWh energia producida ina indemnisaziun da in rap. Cun ils responsabels da l’autra ovra solara, a Magriel, han ins fatg giu da survegnir ina pauschala, n’emporta betg quant che vegn producì.
Sco quai è vegni orientà a la radunanza han omaduas vias ses avantatgs e dischavantatgs. Surtut cura che quai na vegn betg producì blera energia è la soluziun cun ina pauschala d’avantatg per la vischnanca, en temps da blera producziun percunter betg. Ed il cuntrari tar l’indemnisaziun per ura kilowatt. Qua na datti naginas entradas sche l’ovra croda ora pervia d’ina panna ni sche quai dat blera energia sin il martgà e l’ovra na vegn betg duvrada, quai possia surtut esser la stad il cas, han ils responsabels ditg a la radunanza dal parlament da venderdi saira.
Era aspects tecnics han dà da discutar
Surtut l’ovra sin l’Alp Run, in territori fin uss quasi betg duvrà turistic e senza gronda infrastructura, ha procurà per dumondas da la realisaziun. Uschia è planisà da construir ina pendiculara da material per vegnir al lieu cun la gronda part dal urden. Era è vegni orientà che la gronda part dal material duai vegnir transportà cun il tren en la regiun. Ina staziun temporara na vegni dentant betg a dar, uschia ch’il material sto la finala tuttina vegnir transportà al lieu cun camiuns.
Era da discutar ha la dumonda da principi, numnadamain sche la vischnanca è pronta d’unfrir grondas parts da lur territori per la producziun d’energia, ni da proteger la cuntrada era ord ina vista turistica, nua che la cuntrada è il chapital, uschia ina da las argumentaziuns.
La finala n’han ils arguments dals iniziants persvas la gronda part da las cusseglieras ed ils cussegliers. Uschia è la fatschenta per l’ovra solara sin l’Alp Run, vegnida approvada cun 9 cunter 3 vuschs tar ina abstenziun. L’ovra Magriel ha survegnì 12 vuschs tar ina abstenziun.
Sco proxim ha la populaziun da decider
Las fatschentas vegnan anc suttamessas a la votaziun a l’urna. Uschia ha la populaziun da Mustér da decider ils 22 d’october a l’urna sur da las duas ovras solaras planisadas. La finamira per omadus projects è alura d’inoltrar sin la fin d’onn la dumonda da construcziun.
Sche las ovras produceschan gia 10% da lur capacitad il 2025 spetgan subvenziuns da la Confederaziun. La gronda sfida è che l’infrastructura sto era esser realisada sin il 2025 perquai che l’energia sto vegnir manada a val e spisgentada en la rait per survegnir in sustegn.
