La cassa communala da Laax è plaina sco anc mai. Quai demussa il rapport annual che la vischnanca ha repartì a las chasadas e ch'è avant maun a la plattafurma FMR. Il gudogn munta a 7'452'882 francs – in record. Las finanzas da la vischnanca da Laax sajan stadas en in stan meglier che mai la fin da l'onn 2023 , vegn cità il president communal da Laax Franz Gschwend.
Il quint annual serra cun in cashflow da passa 9 milliuns francs. Quai tar entradas da record da passa 29 milliuns francs ed expensas da passa 19,8 milliuns francs. Cun quest resultad positiv po la vischnanca far amortisaziuns da passa 1,8 milliuns francs, uschia ch'il quint serra cun il gudogn da record da passa 7,4 milliuns francs.
Las votantas ed ils votants da Laax ston entant anc approvar il quint. Quai a chaschun da la proxima radunanza communala ch'ha lieu ils 13 d'avrigl.
Era la populaziun crescha
Betg be las finanzas creschan a Laax, mabain era la populaziun. Tenor il rapport annual han la fin da l'onn 2023 2263 persunas vivì a Laax.
