«Detectiv Allegro» cumbinescha musica da brass cun ina interessanta e legra istorgia da detectiv. Il quart cas d’ina seria è vegnì scrit per l’emprima giada era per musica da brass. Il concert è da vesair la dumengia da Pasca a Rabius ed il glindesdi da Pasca a Breil – ed el è ina premiera rumantscha. Las duas musicas da Breil-Dardin e da Rabius-Surrein èn s’unidas per l’ina per pudair dar quest concert cun retschas plainas, ma era per tgirar la buna collavuraziun naschida tras las nozzas dal dirigent da Breil-Dardin Guido Bass e la presidenta da la musica da Rabius-Surrein Martina Bass-Berther. Quai raquinta il pèr maridà. Uschia possian els profitar tuts in da l’auter. E cun David Flepp sco detectiv Allegro hajan els era chattà in protagonist per la rolla, ch'haja gronda experientscha cun teater d’uffants e cun inscenaziuns improvisadas, declera Guido Bass che dirigia la furmaziun.
Premiera tudestga stada l’october a Lucerna
Vegnids sin l’idea da dar in toc in zic auter èn Guido e Martina Bass-Berther suenter ch’els han visità la premiera dal toc per musica da brass l’october a Lucerna. La pussaivladad da mussar al public, ma surtut era als uffants, la musica da brass cun tut ils instruments ha fascinà. Ma era da pudair mussar quest toc per l’emprima giada per rumantsch. Suenter hajan els dumandà lur uniuns ed er la cumponista Evi Güdel-Tanner per la lubientscha. La Lia Rumantscha haja alura fatg la traducziun ed uschia saja l’idea vegnida realisada, declera Guido Bass.
Ina finamira saja naturalmain era da motivar da vegnir a sunar en las retschas da la musica, pertge omaduas musicas han scart cun commembras e commembers. Perquai èsi er stà cler ch'els veglian anc far in percurs d’instruments suenter il concert, che mintgin e mintgina possia sezza ina giada empruvar da sunar, di Guido Bass. La finamira è da motivar famiglias da vegnir, ma betg sulet. Uschia è mintgin envidà da vegnir ed ina giada betg sulet seser sin ina sutga e tadlar – mabain da sa participar activamain al concert e da passantar in'ura da musica e divertiment in zic autra.