L'onn 1524 en la Lia Grischa, la Lia da las diesch Dretgiras e la Lia da Dieu sa colliadas al stadi liber da las Trais Lias. Quai è per uschè da dir stada la naschientscha dal chantun Grischun. Per commemorar quai eveniment organisescha il chantun Grischun durant l'entir onn 2024 differentas occurrenzas. Planisadas en set dietas federalas en l'entir intschess dal chantun. L'entschatta vegn dada a Glion il prim e 2 da zercladur. Suenter suondan Tavau, San Vittore/Roveredo, Cuira, Poschiavo/Brusio e Müstair.
En il stadi da las Trais Lias eran las dietas federalas las pli impurtantas radunanzas. En turnus regular era Glion, sco lieu da fundaziun dal stadi liber e lieu principal da la Lia Grischa, lieu da dieta per quellas dietas federalas. Perquai cumenzan las festivitads da commemoraziun a Glion ils 31 da matg e cuzzan enfin ils 2 da zercladur.
Far punts
Durant quests dis organisescha il comité d'organisaziun, che stat sut il presidi da Rino Caduff, differentas occurrenzas. Uschia datti tranter auter in til da festa, in martga istoric en il Martga Vegl da Glion, u producziuns da teater en il liber en la curt dal Museum Regiunal da la Surselva sut il titel «Mercenario».
Il Museum Regiunal da la Surselva deditgescha ina exposiziun al giubileum da 500 onns stadi liber. Quai sut il titel «13x Ilanz/Glion cumin e cuminonza». Cun questa exposiziun vul il Museum guardar enavant e betg enavos. En ina seria da fotografias e da registraziuns da tun vegnan persunas da tut las 13 fracziuns purtretadas. Ils visitaders da l'exposiziun pon s'exprimer tar temas sco: participaziun, furmaziun d'opiniun, convivenza u engaschament per la societad. Finamira da l'exposiziun è, d'integrar la populaziun uschè ferm sco pussaivel.