Mario Theus è inschigner forestal. Enconuschent è el vegnì il 2007. Lezza giada ha el localisà e persequità l’urs JJ3. Quel è a la fin vegnì empaglià en il museum da la natira. Theus ha sa fatg in num sco expert dad urs, el ha lavurà per il chantun Grischun e per la Confederaziun. Il return dals animals da rapina occupan el dapi blers onns, er en sias rollas sco chatschader e filmader da natira.
Creschì si e Theus en Val Müstair. Oz viva el en la Val Calanca. Là saja quai anc pli quiet ed el saja anc pli damanaivel da la natira. Il luf n’ha Theus anc mai vis en ses dachasa, inscuntrà lez ha el però en Slovenia. Là è il luf ì en sia trapla fotografica. In’experientscha cun il luf ha el er fatg en il Canada. La notg è el vegnì tranter lufs ch'urlavan.
Dapi il prim da december 2023 pon vegnir sajettads en Svizra entirs trieps. Tenor Theus pudess quest culp dentant ir davosora. Envers RTR ha el ditg: «I pudess capitar il medem sco en l’Italia. Là han ins decimà ferm ils trieps. Ils lufs ch’ins ha laschà viver na sa sentivan betg pli segirs ed han suenter fatg dapli donns ch'avant entirs trieps».
Dapli scienza e damain politica
Mario Theus di da sasez ch’el na saja betg in extremist. El possia viver cun singuls lufs problematics che vegnian sajettads. Per motivs politics vegnian ussa però eliminads entirs trieps. «Jau giavischass ch’ins resguardass en connex cun il luf dapli enconuschientschas da la scienza ch'ideas da la politica.» El conguala il return dal luf cun il return da l’evla. Era quel utschè da rapina ha reconquistà las Alps. Ins haja laschà viver ils individis e la populaziun saja sa reglada da sez.
