Dapi varga 40 è la plazza cumin da Tumein uschia sco quai ch'ella è uss. Numnadamain in plaz circumdà da chasas e clavads, ina funtauna e parcadis per bun in tozzel autos.
La muntada da la plazza è sa midada
Dapi che la veglia chasa communala è vegnida stgarpada giu l’onn 1972 è il desideri qua tar ina part dals abitants da far insatge ord la plazza cumin. Quai di Felix Jörimann ch'è creschi si a Tumein ed enconuscha fig bain l'istorgia dal vitg. La muntada da la plazza saja sa midada in zic cun ils decennis.
En il 19avel tschientaner manavan impurtantas vias tras il vitg. Uschia che Tumein aveva traffic da commerzi. Plinavant eran pliras stizuns, ina mazlaria ed era ustarias èn il center, uschia ch’i veva adina ina tscherta fluctuaziun da glieud. Uss èn sulettamain anc ina stizun ed ina pasternaria en il conturn da la plazza. Uschia ch’il lieu saja pli pauc in lieu da s’entupada che anc pli baud.
Ideas dentant naginas concretas
I haja adina dà discussiuns davart la plazza cumin. Tscherts abitants eran da l’avis ch'in parcadi na saja betg ina soluziun a lunga vista. I haja dentant era adina dà glieud ch'era cuntenta cun la situaziun uschia sco ella è. Ideas haja medemamain dà differentas. Concretas e realisablas sajan dentant las pli paucas stadas.
Project per ina nova plazza
L’onn vargà ha la vischnanca decidì da restructurar la plazza. E dapi l’onn vargà è er in project concret sin maisa e cun quel era in investider. Tuttina ha il project che prevesa ina garascha sutterrana, in bajetg cun pliras abitaziuns ed in restaurant procurà per grondas discussiuns el vitg. Tscherts n’èn betg cuntents cun la grondezza dal project. Auters èn dentant da l’avis ch’i saja uss nairas uras da far insatge ord la plazza.
RR actualitad 07:00