L'istoricher d'art Beat Stutzer ha fatg in'examinaziun scientifica e vegn a la conclusiun, che la skizza per la restructuraziun da la fatschada da la baselgia da Nossadunna a Savognin saja vairamain da Giovanni Segantini.
3 mais ha il criticher d'art Beat Stutzer analisà la skizza da Giovanni Segantini. La skizza che mussa ina proposta da Segantini per renovar la fatschada da la baselgia Nossadunna a Savognin.
Beat Stutzer ha svutrar en ils archivs e chattà ils protocols che cumprovan che la skizza è originala.
I sa tractia da la suletta ovra da Segantini che haja sco «art en la construcziun» ina relaziun evidenta cun Savognin, constattescha Stutzer. Er sch'i na saja betg ina capodovra, haja la skizza ina gronda valur per la vischnanca.
Savognin aveva dà in chanaster a Giovanni Segantini
Giovanni Segantini viveva dal 1886 enfin il 1894 a Savognin - e para che quai ha plaschì bain ad el. Per dir grazia als da Savognin, per lur ospitalitad e curtaschia aveva el offrì da restructurar gratuitamain la fatschada da la baselgia da Nossadonna.
Quai fa grond plaschair che nus avainsa uss ina skizza da Giovanni Segantini. Per Surses è quella skizza ina schanza. Cun quella pudainsa nus mussar che Segantini era activ a Surses, quai che na era mai tant preschant.
Quels da Savognin hajan però refusà la purschida perquai ch’i avevian tema da stuair surpigliar ils custs per la colur. Cun questa decisiun han els desistì ad in’ovra ch’avess oz ina valita nunpajabla, scriva la vischnanca da Surses en ina communicaziun.
Segantini aveva gia lavurà vi da la baselgia
Quai demussa ina skizza dad il portal d’entrada restructurà da la baselgia da Nossadonna. La skizza era vegnida chattada en in tschaler sut la sala Segantini a Savognin tranter auters utensils a chaschun da retschertgas per la festa da Segantini.
Be per cas eran vegnids chattads l'onn 2009 a San Murezzan en la baselgia refurmada tar la renovaziun da quella duas autras ovras da Giovanni Segantini.
Là eran vegnids chattads dus placats dissegnads da l'artist l'onn 1898 a chaschun da la festa da chant chantunala a San Murezzan. Segantini era giast d'onur a la festa. Spezial vi da quels dus placats è, che Giovanni Segantini na dissegnava en sasez nagins placats. Ils placats eran en ina chista da lain.
RR novitads 18:00