L'idea da la campagna che la Turissem Savognin Bivio Alvra SA ha lantschà ensemen cun ils differents purtaders da la regiun sco per exempel la scola da skis, las pendicularas e la gastronomia, è simpla: far reclama par nizzegiar in congedi pli lung da la lavur quotidiana per vegnir a lavurar durant in temp en il Surses.
Simpel e spert saja lura er la campagna «Auszeit» stada lantschada, di Tanja Amacher, la directura da l'organisaziun turistica. Sur la plattafurma sajan vegnidas bel e bain 100 annunzias en il Surses che l'organisaziun turistica haja pudì distribuir vinavant als differents purtaders da la regiun. La bilantscha la fin da la stagiun d'enviern è dal tuttafatg positiva .
La bilantscha da la campagna è considerablamain meglra che tut quai che nus tuts avessan pudì ans imaginar.
Da numnar las raschuns per il grond success saja grev, di Tanja Amacher. La problematica da la mancanza da persunal saja simplamain stada sin maisa ed or da quai haja lura sa dà il rest. E quai a moda nuncumplitgada, senza scriver paginas e paginas da concepts.
La campagna para simpalmain d'avair tutgà la noda.
Cun la campagna hajan els evidentamain fatg insatge ch'i n'haja fin là anc mai dà en questa furma. Sch'ins fetschia insatge nov, insatge tut auter, lura survegnian ins er blera attenziun, di Tanja Amacher. Quai saja uss simplamain ì si. Ina speranza da la campagna saja er stada che las persunas engaschadas temporarmain survegnian forsa gust da puspè turnar en il Surses per in'ulteriura perioda da lavur. Sco Tanja Amacher po tradir, haja ina u l'auter gia annunzià ch'el u ella turnia gugent puspè il proxim enviern per lavurar in'urella en il Surses.