Actualmain è il tunnel var 600 meters lung. Cun laschar cular aua ord il terren sur il tunnel or da la muntogna, speran ins da pigliar la pressiun ord la massa. Uschia duai il «rutsch» dal vitg vegnir franà.
Sco quai ch’ils geologs han infurmà, saja gia grategià da calmar in pau il grip sur Brinzauls cun sbassar la pressiun da l’aua. Per part sa movia il terren mo pli per la mesadad. Uschia sajan per exempel ils moviments dal vitg da Brinzauls sa sminuids da 1,60 meters sin 1,05 meters per onn.
Dapli infurmaziuns e rapports
Daniel Albertin, il president da la vischnanca Alvra sa mussa cuntent. Ins saja sin buna via cun il project – e cun quai er in pass vinavant per garantir a lunga vista ch'ins po abitar a Brinzauls. Er en il vitg saja l'atmosfera pli schluccada.
Lavurs van vinavant
Las lavurs enturn il tunnel da sondagi sut Brinzauls èn pli u main a fin. A partir da la primavaira da l'onn proxim vegn il tunnel dentant anc prolungà. Cun prolungar il tunnel e cun far dapli che 100 ulteriuras perfuraziuns, speran ils geologs da pudair drenar la muntogna e da stabilisar il rutsch da Brinzauls.
La vischnanca Alvra ha gia approvà il credit da 40 milliuns francs. Chantun e Confederaziun ston anc approvar la fatschenta.
