Naschida è l'idea per il Pumptrack Val Schons dals trais giuvenils dad Andeer Gianna Waser, Maurus Staubli e Valerio Müller ch'han oz 13 e 14 onns. Sin viadi a chasa d'ina excursiun sin in pumptrack han els gì l’idea, ch'il fiss bel sch'il dess er uschè ina pista ad Andeer. Ditg e fatg! Quasi mintga mesemna suenter mezdi èn ils trais giuvenils s'inscuntrads per metter ensemen in dossier per la suprastanza communala. Suenter han ils trais giuvens pudì preschentar lur project a la radunanza communala.
Cun sustegn da lur mammas ch'han fundà l'uniun Pumptrack Val Schons ed il Parc Natiral Beverin èn els ids sin la tschertga da sponsurs e raps – cun success! La populaziun ha dà il consentiment per il terren, la finanziaziun gartegia grazia a bleras donaziuns, sponsurs da fundaziuns e bleras fatschentas localas.
Las stentas han purtà fritgs
Gianna Waser, Maurus Staubli e Valerio Müller han investì bler temp e grondas stentas per lur project. E las stentas han purtà fritgs: Il pumptrack ad Andeer vegn bajegia! In project da tut en tut 170'000 francs, che trais giuvenils han mess sin pais. Sche tut va tenor plan vegn quel inaugurà questa stad. Ils trais giuvenils èn sezs in zic paf che quai è propi gartegià. Els hajan er emprendì ina massa durant l'entir project.
Jau na vess mai pensà che nus vegnin uschè lunsch!
Il pli cool e stà che nus avain dastgà preschentar noss project a la radunanza communala, in eveniment ch'è uschiglio be per creschids.
Jau sun fitg loscha. Igl è in fitg bel sentiment d'avair mess en pe uschè in grond project.
Punct inizial per ils pumptracks en il Grischun
L'uffizi da sanadad dal grischun e grischun sport han il 2012 bajegià in pumptrack en l’exposiziun HIGA. En connex cun l'acziun «Bisch fit?» haja ins vulì porscher a las vischnancas insatge uschè universal sco pussaivel di Thierry Jeanneret, il manader da sport Grischun. Ina purschida che grond e pitschen, vegl e giuven, sportiv e mais sportiv possian nizzegiar. Bainspert saja ins vegnì tar ils pumptracks. Durant il temp d'acziun da trais onns (da 2012 – 2015) han 12 vischnancas prendì la chaschun da realisar in tal percurs da velo cun sustegn dal chantun. Il sustegn dal chantun na saja betg stà sulettamain en furma da raps, mabain er ina cussegliaziun primara, ina proposta da budget ed visualisaziuns dal project. Quai che saja tenor Thierry Jeanneret stà in factur principal per il success dal project. Tut en tut èn fin ussa vegnids realisads 22 pumptracks en il grischun cun il sustegn dal chantun. Tenor il manader da sport grischun Thierry Jeanneret possia ins bain discurrer d'in «boom» ils ultims 12 onns.
Il fascinant vi d'ils pumptracks è, ch'igl è ina purschida fitg averta, nua che l'in cun l'auter funcziuna simplamain.
