Siglir tar il cuntegn

Header

video
Chaschiel na bun
Or da RTR dals 21.04.2017.
laschar ir. Durada: 2 minutas 43 Secundas.
cuntegn

Engiadina Müstair: Producziun da chaschiel cun problems

Radund 17 tonnas chaschiel da la Val Müstair èn vegnidas refusadas da la Emmi causa bacterias che derivan dal pavel da silo.

La Emmi, che è la pli gronda elavuratura da latg en Svizra, surpiglia ina gronda part dal chaschiel che vegn producì en la Val Müstair. La producziun dal december e dal schaner ha ella ussa refusà. Quai sa tracta da radund 17 tonnas.

Il motiv sajan bacterias d’acid da paintg

La concentraziun da quellas bacterias saja tenor Emmi massa auta. Tras quai daventian las foras en il chaschiel massa grondas ed il gust na saja pli il gust giavischà.

audio
Chaschiel nausch causa bacterias
ord Novitads dals 21.04.2017.
laschar ir. Durada: 2 minutas 39 Secundas.

Tenor il president da la Chascharia Val Müstair Gian Bott saja zunt clar danunder che las bacterias derivian. Il problem saja il pavel da silo. Probablamain haja in pur pavlà ina balla da silo che n'era betg buna. Da tge pur ch'i sa tracta è grev d’eruir. Dals 15 purs che furneschan latg a la chascharia pavlan radund la mesadad silo.

Ina soluziun radicala è en vista

Per evitar problems cun bacterias dal silo dovra la chascharia dapi blers onns ina bactofuga. Quai è ina sort centrifuga che allontanescha las bacterias. Questa giada era la concentraziun da bacterias probablamain massa auta.

En l’avegnir na duess pli capitar quest problem. Gia avant pli che 5 onns han decis ils purs da la Val Müstair da chalar l'avust 2017 cun pavel da silo.

Artitgels legids il pli savens