Cun realisar la fundaziun per il nov center da sanadad, pon ins uss er integrar la terza organisaziun, la Spitex Valposchiavo. Plaz en il cussegl da fundaziun duain pigliar duas persunas per vischnanca e trais externas.
Conferma da candidats per cussegl
Per la vischnanca da Poschiavo vegnan proponids il podestà Alessandro Della Vedova ed il cusseglier communal Renato Isepponi. Per Brusio èn nominads il sindaco Arturo Plozza ed il cusseglier communal da Brusio Donato Fanconi.
Politica ha maioritad
Cumplettà il cussegl da la nova fundaziun duain Monika Märky che ha gia accumpagnà pliras fusiuns, il medi Emanuele Bontognali ed il fiduziari Antonio Pola. Sco quai che Donato Fanconi ha declerà ad RTR duain ils 7 candidats vegnir confermads en lur uffizi da tuttas duas vischnancas. Tar il cussegl communal da Poschiavo saja quai previs per ils 10 da zercladur 2016.
La fusiun da las trais organisaziuns vala retrospectiv a partir dal 1. da schaner 2016.