L'onn 1930 ha gì lieu l'emprima ediziun da la cursa rapida populara, che maina giu dal Diavolezza e sur ils glatschers, da lez temp cun 300 participants e participantas. 34 giadas ha la cursa gì lieu. Suenter il 1980 èsi dentant stà a fin cun la cursa – pertge n'è oz betg cler.
La sonda, ils 16 da mars ha la cursa dentant gì ses revival – 44 onns suenter sia ultima ediziun. 195 skiunzas e snowboardists han fatg part da la pli lunga cursa rapida sin glatschers. Ella maina otg kilometers sur ina pista che na vegn betg preparada - e quai sur il Vadret Pers ed il Vadret da Morteratsch - cun vista sin il Piz Palü ed il Piz Bernina.
In duel uffizial hai dà tranter l'anteriur snowboardist da profi Nevin Galmarini ed il moderatur da SRF e magister da skis Salar Bahrampoori.
Malgrà ch'els enconuschan omadus la pista – han els curt avant lur partenzas anc survegnì in pèr tips da l'anteriur skiunz da profi Dumeng Giovanoli, ch'aveva gudagnà la cursa il 1962.
L'um dad 83 onns ha gì grond plaschair cura ch'igl è stà cler, ch'i dettia in revival da la cursa populara. Cun esser da la partida la sonda e guardar partir ils skiunzs e las snowboardistas ha l'um, che va er oz anc bler cun skis, sez tschiffà gust da sa participar ina giada ensemen cun sia famiglia. Er sch'el admetta che quella finamira pretendess anc in pau trenament.
A l'arrivada a Morteratsch è lura stà cler, ch'ils skis èn cleramain d'avantatg tar il duel per la cursa cun pliras parts plitost planivas e per part schizunt ascendentas. E tuttina è Nevin Galmarini - cun ses temp da 18 minutas e 34 secundas – mo stà var 40 secundas pli plaun che Salar Bahrampoori ch'ha gì 17 minutas e 53 secundas. E malgrà duel han ils dus concurrents a la fin fatg in viva sin lur cursas.
