Siglir tar il cuntegn

Header

cuntegn

Engiadina Construir in trail durant las vacanzas

En Val Müstair hai dà la prima emna da «Build and Bike». 16 partecipantas han fatg vacanzas gratuitas. Durant la bunura han els gidà da construir trails. Il suentermezdi han els pudì far turas cun velo da muntogna.

audio
Bunura: Success per l'emna «Build and Bike» en Val Müstair
ord Actualitad dals 22.05.2017.
laschar ir. Durada: 4 minutas 13 Secundas.

L'associaziun Bike Val Müstair è fitg cuntenta cun la prim'emna dal project «Build and Bike» en Val Müstair. Tenor la suprastanza èn sa participadas 16 persunas da l'Austria, da la Germania e da la Svizra a l'emna per gidar da construir trails per velos da muntogna en Val Müstair. Ils participants han pudì far vacanzas gratuitas durant in'emna. Sco cunterprestaziun han els gidà adina la damaun da construir trails. Durant il suentermezdi han els pudì far turas cun il velo da muntogna.

Lavur e reclama

L'acziun haja gì in grond resun en las medias socialas. Ins haja gì bler dapli annunzias che posts libers. Ils participants ch'èn arrivads en Val Müstair èn intgantads da la cuntrada ed han gust da pudair dir ch'els hajan gidà tar la construcziun da tschertas passaschas. Divers dals participants vulan returnar en Val Müstair. Uschia ha l'acziun in effect da reclama en la scena da quels che van cul velo da muntogna.

La vischnanca da la Val Müstair profita da l'autra vart da la lavur ch'ils giasts specials fan lung las sendas en Val Müstair per avair la fin ina rait da trails per velos da muntogna. Quellas lavurs na pudess'ins per part betg far senzas agid da pliras persunas.

Durant il settember è planisada in'ulteriura emna da «Build and Bike» en Val Müstair.

Artitgels legids il pli savens