Diversas incumbensas spetgan quels dis sin las cumpagnias da protecziun civila ch'èn staziunai a San Murezzan. Els han da reglar il traffic, d'administrar las plazzas da parcar, da tgirar ils parcadis dals bus sco er da gidar ad installar ed a tegnair en funcziun l'entira infrastructura da concurrenza.
Il cader trenescha la lavur interchantunala
Tut en tut 105 persunas, 85 commembers e 20 policists, da la protecziun civila dal Grischun èn en acziun per sustegnair ils campiunadis mundials. En tut prestan els 855 dis da servetsch, sco il chantun communitgescha. Durant ils campiunadis mundials datti ina collavuraziun cun ils chantuns Son Gagl e Turitg – era or da lez chantuns èn cumpagnias a San Murezzan.
Sco il departament chantunal da giustia, segirezza e sanadad scriva sajan pervia da quai era ils commembers da cader en acziun. Els treneschan la tecnica specifica e tiran conclusiuns per scolaziuns e per acziuns futuras. Uschia veglian els trenar l'abilitad da collavurar sin plaun interchantunal en cas d'eveniments gronds.
Ed era suenter l'occurrenza n'è la lavur betg finida. Lura liquideschan ils servetschs civils lavurs da rumida e da restabiliment – la protecziun civila è pia anc in temp en acziun en l'Engiadina.
RR novitads 11:00