Siglir tar il cuntegn

Header

video
L’exposiziun mundiala a Milaun è a fin – ina bilantscha
Or da Telesguard dals 30.10.2015.
laschar ir. Durada: 4 minutas 5 Secundas.
cuntegn

Engiadina 21 milliuns visitaders per la ExpoMilano

L’exposiziun mundiala a Milaun serra sias portas la fin da quest mais. Tenor las emprimas cifras da l’organisaziun han ins cuntanschì la finamira d’avair beneventà almain 20 milliuns visitaders durant ils ultims 6 mais.

L’interess per l’exposiziun cun 145 pajais ch'èn participads è creschì surtut durant ils ultims dus mais cun fin 200'000 persunas per di. Dentant èn las colonnas avant ils pavigliuns era creschidas ed han procurà per 4 fin 5 uras da spetg avant che pudair entrar.

Puspè demontar tut

audio
20 milliuns visitaders a l'ExpoMilano
ord Actualitad dals 30.10.2015.
laschar ir. Durada: 5 minutas 40 Secundas.

A partir dal november cumenzan las lavurs puspè sin l’areal dad 1 milliun meters quadrat. Tut ils edifizis - cun excepziun dals dus pavigliuns talians – han da vegnir allontanads entaifer ils proxims 6 mais. Entant ch’ils ins vegnan simplamain sbuvads e reciclads, vegnan auters translocads en in auter lieu. Uschia è per exempel il nov dachasa dals containers da Monaco a Burkina Faso. Nua che las trais turs da la Svizra van e sch’ellas vegnan insumma anc duvradas n’è anc betg enconuschent. En media han visità 11'400 persunas al di il pavigliun svizzer.

Speculaziuns cumenzan

A partir dal matg 2016 fiss l’areal da l’ExpoMilano puspè liber e pront per ina nova furma d’utilisaziun. Entant datti pliras ideas: d’in stadion per ina da las duas squadras da ballape da Milaun, fin tar in campus d’universitad. Possessura dal terren è dentant la societad ExpoMilano. Tar quella han tant la citad da Milaun in pled en chapitel, sco era la regiun da la Lumbardia ed il stadi talian.

Artitgels legids il pli savens